تاند (جمعه د وري – حمل ۷مه) پاکستان د تورخم دروازه د نیمې ورځې تر پرانیستو وروسته بیرته د کډوالو پرمخ وتړله.
ننګرهار کې د طالبانو د حکومت د اطلاعات او کلتور ریاست د اطلاعاتو امر قریشي بدلون پر خپله فېسبوک پاڼه دا خبر لیکلی دی.
هغه په دې تړاو د دروازې د تړل کېدو دلیل نه دی لیکلی.
دغه لار پرون پنجشنبه له اوږده ځنډ وروسته پرانیستل شوه، چې پرې له پاکستان څخه سلګونه افغان کډوال د تورخم له لارې هېواد ته راستانه شول.
په یادو تازه راغلو کډوالو کې شاوخوا ۲۰۰۰ هغه کسان شامل وو چې د پاکستان له زندانونو تازه ازاد شوي وو.
دغه لار داسې مهال بیا تړل کېږي چې، اوس هم له فرضي کرښې اخوا سلګونه کډوال افغانستان ته د راتګ په پار د انتظار شېبې تېروي.
د طالبانو او پاکستان ترمنځ د روان کړکېچ شاوخوا شپږ میاشتې پوره کیږي خو لاهم داسې حل نه دی لټول شوی چې دواړو غاړو ته جګړه ودروي.