تاند (چهارشنبه، د وري/ حمل ۵ مه) د افغانستان د سوداګرۍ او پانګونې خونې اعلان کړی چې «په افغانستان کې جوړ شوي» تر سرلیک لاندې د افغاني تولیداتو یوه لوی نندارتون نن (چهارشنبه) د ازبکستان په پلازمېنه تاشکند کې پرانیستل شو.
د خونې په وینا، دا نندارتون چې د ملګروملتو د پراختیايي پروګرام له مالي ملاتړ څخه برخمن دی، د جمعې تر ورځې پورې به دوام وکړي او هدف یې د افغانستان د تولید او صادراتي وړتیاوو نندارې ته وړاندې کول دي.
له ۶۰ څخه ډېرې غرفې د افغان سوداګرو له خوا جوړې شوې دي، چې پکې بېلابېل توکي لکه غالۍ، وچې او تازه مېوې، زعفران، جلغوزې، پنبه، قیمتي او نیمه قیمتي ډبرې او همدارنګه مشروبات نندارې ته وړاندې کېږي.
د خونې چارواکو هیله څرګنده کړې چې دا نندارتون به د افغانستان او د سیمې د هېوادونو، په ځانګړي ډول له ازبکستان سره، د سوداګریزو اړیکو په پراخېدو کې مرسته وکړي.