تاند (شنبه، د ۱۳۰۵ لمریز کال د وري/ حمل لومړۍ) د ایران نوي لوی مشر مجتبي خامنهیي د نوي کال (نوروز) په پیغام کې ویلي چې افغانستان او پاکستان د ایران لپاره ډېر نژدې هېوادونه دي.
د ایران رسنیو د مجتبی خامنهيي لیکلی پیغام خپور کړی، چې پکې هغه د نوي لمریز کال او کوچني اختر مبارکي ویلې ده.
هغه د دواړو هېوادونو ترمنځ د اړیکو د ښهوالي غوښتنه وکړه او افغانستان او پاکستان یې «وروڼه هېوادونه» وبلل. خامنهیي ټینګار وکړ چې دواړه لوري باید د همکارۍ او تفاهم د پیاوړتیا لپاره کار وکړي، څو د مسلمانانو ترمنځ وېش رامنځته نه شي او دا کار د «خدای د رضا» لپاره مهم دی.
نوموړي زیاته کړه چې دی په شخصي ډول چمتو دی چې د دواړو هېوادونو ترمنځ د اړیکو د پیاوړتیا لپاره لازم ګامونه واخلي.
دا څرګندونې په داسې حال کې کېږي چې په وروستیو میاشتو کې پاکستان پر افغانستان هوايي او مځکني بریدونه پیل کړي چې د افغانستان له غبرګون سره مخامخ شوي دي.
د ډیورنډ کرښې په اوږدو کې د نښتو، هوايي بریدونو او د وسلوالو ډلو د فعالیتونو پر سر د تورونو له امله د افغانستان او پاکستان ترمنځ شخړې د کمکي اختر په مناسبت د درو هیوادونو، ترکیې، سعودي او قطر په غوښتنه په موقتي ډول درول شوې دي.
د مجتبي خامنهيي د پیغام نورې برخې
هغه په خپل پیغام کې د ۱۴۰۵ کال شعار «مقاومتي اقتصاد د ملي یووالي او ملي امنیت تر سیوري لاندې» اعلان کړ او ژمنه یې وکړه چې د اداري او اقتصادي ستونزو د حل لپاره به «اغېزمنه حللاره» وړاندې کړي. دا پیغام د ایران له تلویزیونه هم ولوستل شو.
مجتبی خامنهيي د خپل پیغام په پیل کې تېر کال ته اشاره کړې او ۱۴۰۴ کال یې داسې کال بللی چې د هغه په وینا، د ایران خلکو درې ډوله جګړې تجربه کړې: پوځي او امنیتي جګړې. هغه له اسرائیل او امریکا سره ۱۲ ورځنۍ جګړه، د «دی میاشتې اعتراضونه» (چې هغه یې «کودتا» بولي)، او همداراز یې له امریکا او اسرائیل روانه جګړه یادې کړې دي.
هغه لیکلي چې امریکا او اسرائیل فکر کاوه د نظام د «مشر» په وژلو به د دوی په ګټه یو لوی ولسي خوځښت رامنځته شي، خو د هغه په وینا هغوی «ناامیده» شول او پر ځای یې «سخت ګوزار» وخوړ.