تاند (سې شنبه، د کب/ حوت ۱۲ مه) د افغانستان او پاکستان ترمنځ د ترینګلتیا له امله د پاکستان کرکټ بورډ پرېکړه کړې چې ملي شل اوریز ټورنمنټ د راولپنډۍ کرکټ سټیډیم ته ولېږدوي، او پېښور یوازې د نیمه پایلوبې او پایلوبې کوربه پاتې شي.
د لومړني مهالوېش له مخې ټاکل شوې وه چې ټورنمنټ د مارچ په ۵مه په پېښور کې پیل شي او ادارې په دې ښار کې ټولې تیارۍ بشپړې کړې وې. خو د پاکستان کرکټ بورډ پرون نوی مهالوېش خپور کړ او اعلان یې وکړ چې ټولې سیالۍ راولپنډۍ ته انتقالوي یوازې د مارچ په ۱۶مه به دوې نیمه پایلوبې او د مارچ په ۱۷مه پایلوبه په پېښور کې وشي.