تاند (سېشنبه، د کب/ حوت ۵ مه) د ترکمنستان ولسمشر قربانقُلي بیرديمحمدوف وايي چې د ټاپي (TAPI) د ګازو د پروژې لومړی پړاو به د ۲۰۲۶ کال تر پایه بشپړ شي.
هغه وویل چې دا پروژه د دغه هېواد د انرژۍ د ملي پروګرامونو له مهمو لومړیتوبونو څخه ده.
ښاغلي محمدوف له یوې عربي رسنۍ سره په خبرو کې، (چې پرون دوشنبې خپرې شوې) ټینګار کړی چې عشقآباد د دې پروژې په پلي کېدو کې د نړیوالو شرکتونو ګډون ته هرکلی وايي.
د روانې فبرورۍ په لومړۍ نېټه د طالبانو د ريیس الوزرا اقتصادي مرستیال مللا عبدالغني برادر د ترکمنستان د صدراعظم له مرستیال او باندنیو چارو وزیر رشید مرادوف سره په کتنه کې وویل، د طالبانو اقتصادي مرستیال ملا برادر وویل چې د سعودي عریستان «ډيلټا» شرکت د ټاپي پر پروژه کې پانګونې ته لېوالتيا لري.
په همدې حال کې، د کانونو او پټرولیم وزارت اعلان کړی چې تر اوسه د ټاپي پروژې ۱۶ کیلومتره پایپ لاین د افغانستان په خاوره کې غځول شوی او نژدې ۱۰۰ کیلومتره نور مسیر د پایپ د نصب لپاره چمتو شوی دی.
وزارت هیله څرګنده کړې چې د روان میلادي کال تر پایه به د پروژې د هرات برخه، چې ۱۵۳ کیلومتره اوږدوالی لري، بشپړه شي.