تاند (جمعه د کب – حوت لومړۍ) ایراني چارواکي وایي، چې د شدید باران او سختو سړو له امله د افغانستان او ایران ترمنځ ګډه پوله کې بند پاتې ۷۰۰ افغان کډوال یې ژغورلي دي.
د ایران د تایباد ولسوالۍ د سرحدي ځواکونو قوماندان، مجید شجاع، په خراسان رضوي دغه خبر رسنیو سره شریک کړی دی.
نوموړي ویلي، چې دغه کډوالو غوښتل په غیرقانوني ډول ایران ته داخل شي، خو د ورښتونو او شدیدو سړو له امله په پوله کې بند پاتې وو.
شجاع په دې په اړه نور جزییات نه دي ورکړي.
دا هم لا معلومه نه ده چې، ایا دغه کډوال بیرته افغانستان ته ستانه شوي که نه.
د چارواکو د مالوماتو له مخې سره له دې چې د ایران او افغانستان ترمنځ پر پوله امنیت سخت شوی، خو د افغانستان څخه ایران ته د کډوالو بهیر لا هم روان دی.
ایراني ځواکونو یوځل بیا افغانانو ته خبرداری ورکړی چې، ایران ته ناقانونه راتګ ته زړه ښه نه کړي او که راشي نو دوی به د «غیرقانوني کډوالۍ» په وړاندې کلک اقدامات وکړي.