شاه محمود میاخیل
د ملګرو ملتونو امنیت شورا یو ځل بیا پرون په متفه توګه د طالبانو په ضد تحریم او د تحریم د کمیټې ماموریت تمدید کړ.
د دې پریکړې عواقب:
د امنیت شورا ۱۵ غړو د پنځو ویتو کوونکو هیوادونو په ګډون؛ امریکا، روسې، چین، فرانسې او انګلستان، په متفه توګه د پریکړې تایدول دا ښایي چې د طالبانو د حاکمیت په هکله دوی په سیمه او نړۍ کې امنیتي تشویشونه لري او هم د طالبانو چلند په داخل د افغانستان کې د افغانانو لپاره ناسم ګڼي.
د چین او روسیې استازو په خپلو تبصرو کې نسبتا نرمې خبرې وکړې چې د تحریم د کمیټې په ماموریت باید تحدید نظر وشي. که دوی واقعا د تحریم د کمیټې په ماموریت کې اصلاح یا کړنو باندې نیوکه درلودلې، نو کولې یې شول چې دا فیصله ویتو کړې وې. د رایه نه وروسته تبصرې بې معنی دي.
طالبان باید پوه شي چې افغانان خو پریږده، د نړۍ او سیمې هیوادونه هم د دوی د تیرو څلورو کلونو د حاکمیت په هکله جدي تشویشونه لري او ټول هیوادونه د طالبانو د حاکمیت سره مثبت نه بلکې منفي تامل د خپلو ګټو او تشویشونو په هکله لري.
البته د نړۍ لپاره افغانستان دومره اولویت اوس نه لري چې د افغانستان د وضعیت د تغیر لپاره د سیاسي، اقتصادي او یا امنیتي نفوذ نه استفاده وکړي، خو دا حالت د افغانستان په ګټه نه دی او عواقب یې د افغانانو لپاره په اوږدمهال کې وخیم دي.
د افغانستان د انزوا حالت نه د وتلو لپاره د داخلي ولسي مشروعیت او د قانونمند حکومت د رامنځته کیدو نه بله لار نشته دی. څومره چې ژر د ولسي مشروعیت لپاره زمینه مساعده شي، هماغومره د افغانانو لپاره ګټوره ده. البته عاقبت د نه مشروعیت د افغانستان لپاره، د افراطي ډلو تقویه کیدل، د نیابتي جګړو او رقابتونو رامنځته کیدل، د طالبانو له منځه تګ او د یوې بلې افراطي ډلې رامنځته کیدل دي چې دغه حالت د افغانستان په ګټه نه دی.
عاقبت په خیر
شاه محمود میاخیل
د افغانستان د سولې او ولسواکۍ د ملي نهضت دوراني مشر او د افغانستان جمهوري غوښتونکو خوځښت د سیاسي چارو مسوول