تاند ( سه شنبه د سلواغې ـ دلوې ۷مه) د بښنې نړیوال سازمان د طالبانو د اطلاعات او کلتور وزارت له لوري د هغو بنسټونو د جوازونو پر لغوه کېدو او د فعالیتونو پر ځنډېدو جدي اندېښنه ښودلې، چې په افغانستان کې له خبریالانو او رسنیو ملاتړ کوي.
یاد سازمان ویلي، چې طالبان هڅه کوي په افغانستان کې د رسنیو د ازادۍ مخه ونیسي.
د بښنې نړیوال سازمان نن سه شنبه د خبرپاڼې په خپرولو سره دغه اقدام بې رحمانه کړنه یاده کړې ده.
په خبرپاڼه کې دغه سازمان له طالبانو غوښتي چې خپله پرېکړه بېرته واخلي او دغو بنسټونو ته بیرته د فعالیت اجازه ورکړي.
یاد سازمان داسې مهال دا اندېښنه ښيي چې، د طالبانو د اطلاعاتو او کلتور وزارت د رسنیو له دریو ملاتړو سازمانونو پرته د نورو ټولو بنسټونو جوازونه لغوه کړي او پر فعالیت یې بندیز لګولی دی.
طالبانو ویلي، دغو بنسټونو په نړۍواله کچه د افغانستان د رسنیو ملاتړو سازمانونو باور ته زیان اړولی و.
یاد وزارت زیاته کړې وه چې، د خبریالانو او رسنیو له پرلهپسې شکایتونو وروسته یې د رسنیو او خبریالانو د ملاتړو بنسټونو هراړخیزه ارزونه کړې او دا اقدام یې اخیستی دی.
د بښنې نړیوال سازمان ټینګار کوي چې د رسنیو ملاتړي بنسټونه د افغانستان لپاره د معلوماتو د ازاد جریان، د حقایقو د خپرولو او د خبریالانو د خوندیتوب لپاره حیاتي ارزښت لري او د هغوی فعالیت محدودول د بیان د ازادۍ له اصولو سره په ټکر کې دي.