تاند (شنبه، د سلواغې/ دلوې ۴ مه) د اروپايي ټولنې د کورنیو چارو وزیرانو د غړو هېوادونو ترمنځ سوریې او افغانستان ته د کډوالو د بېرته ستنولو پر ګډې تګلارې خبرې کړې دي.
د اې پي اې خبري آژانس د راپور له مخې، د اتریش د کورنیو چارو وزیر ګرهارد کارنر ویلي، دا اړینه ده چې د کډوالو د ستنولو پرېکړې د ټولې اروپا په کچه همغږې او عملي شي، نه دا چې هر هېواد جلا اقدام وکړي.
نوموړي زیاته کړې چې د اروپايي ټولنې ګڼ غړي هېوادونه غواړي پوه شي چې اتریش څنګه وتوانېد افغانستان او سوریې ته په مستقیم ډول د کډوالو د ستنولو بهیر پیل کړي.
د کارنر په وینا، تېر کال شاوخوا زر سوریان، ځینې په خپله خوښه او ځینې په جبري ډول، سوریې یا نورو اروپايي هېوادونو ته لېږدول شوي دي.
خو هغه افغانستان ته د ستنول شویو افغان کډوالو کره شمېر نه دی څرګند کړی.
له بلې خوا، د اروپايي ټولنې د کډوالۍ کمېشنر مګنوس برونر ویلي چې د اروپايي ټولنې غړي هېوادونه د افغان کډوالو د ستنولو په اړه له طالبانو سره د تخنیکي خبرو په حال کې دي.
دا خبرې د پنجشنبې په ورځ د قبرس په پلازمېنه نیکوزیا کې د اروپايي ټولنې د کورنیو چارو وزیرانو په غیر رسمي غونډه کې شوې دي.