تاند- له نن څخه ۴۰ کاله پخوا د ۱۹۸۴ د جنورۍ په ۲۴ مه سټیف جابز د اپل کمپنۍ مکنتاش کمپیوټر، چې په نړۍ کې یې لوی بدلون راوست، معرفي کړ.
میکنتاش لومړنی شخصي کمپیوټر و چې ګرافیک او ښکلي فونټونه یې لرل.
د میکنتاش جوړولو پروژه د ۱۹۷۹ په لومړیو کې د اپل کارکوونکي جیف راسکین پیل کړه. د ۱۹۷۹ په سپټمبر کې راسکین پر دې پروژې د کار کولو اجازه ترلاسه کړه. ده په پیل کې د کمپیوټر د یوه داسې انجنیر د موندلو لټه وکړه چې د دې کمپیوټر لومړنۍ طرحه ورته چمتو کړي. څو کاله وروسته راسکین د میکنتاش د جوړولو لپاره یو ټیم چمتو کړای شو.
- دا ټیم له
- Chris Espinosa
- Joanna Hoffman
- George Crow
- Jerry Manock
- Susan Kare
- Andy Hertzfeld
جوړ شوی و. خو راسکین لږ وروسته له دندې ګوښه شو او سټیف جابز د دې پروژې مشري په غاړه واخیسته.
دې (All in one) کمپیوټر، چې په ۱۹۸۴ کې نړۍ ته وړاندې شو، د موټرلا 68k میګاهرټزه پروسیسر، ۹ اینچه سکرین، ۳ اعشاریه ۵ اینچه فلاپي ډرایف او ۱۲۸ کیلوبایټه رم درلود.
د دې کمپیوټر تر ټولو مهمه ځانګړتیا، چې خلکو خوښوله هغه د ګرافیک کاروونکی و چې په ماوس کنټرولېده.
د میکنتاش بیه ۲۴۹۵ ډالره وه. د دې کمپیوټر جګوالی ۳۵ سانتۍ او وزن ۷ نیم کیلو ګرامه و.
اپل یو کال وروسته لیزري پرینټر راوایست او کلونه وروسته میکنتاش لومړنی کمپیوټر و چې زموږ سیمې ته هم راورسید. په لومړیو کې به ډیرو افغانانو له دې کمپیوټره د لیکنو د کمپوز لپاره کار اخیست. عربانو او ورپسې ایرانیانو د خپلو ژبو کیبورډونه پکې جوړ کړل خو افغانانو د پښتو لیکنو لپاره پر میکنتاش د کمپوز کړیو متنونونو پښتو توري په لاس بشپړول.
اپل کمپیوټر وروسته د مایکروسافټ سیالۍ ته ټینګ نه شو خو ډیر کلونه لا تیر نه وو چې اپل کمپنۍ د اوسنیو مک پرو او مک بوک په ګډون ګڼ نور کمپیوټرونه بازار ته وړاندې کړل او همداراز یې د اپل موبایلونو په وسیله په الیکترونیک ټکنالوژۍ کې سرخېل شو.