تاند ( سه شنبه د لیندۍ ـ قوس ۱۱مه) د طالبانو عدلي او قضايي ارګانونو د خوست ولایت په ورزشي لوبغالي کې یو کس په عام محضر کې «قصاص» کړ.
لومړیو کې ویل کېده چې، یاد کس لس میاشتې وړاندې د خوست په علیشیرو او تریزیو په ولسوالیو کې د یوې کورنۍ د ۱۳ غړیو چې ښځې، ماشومان او نارینه پکې وو، پر وژنې تورن و، خو وروسته څرګنده شوه چې، دغه کس په خوست کې یو کس په ډزو وژلی وو.
د طالبانو استناف محکمې ولایتي رییس ملا عین الله په دې تړاو راټولېدنې ته ویلي، چې “بې ځایه وژنې د سرطان دانې ته ورته دي او یوازینۍ حل لاره یې قصاص دی.”
د دغه قصاص لیدو ته سلګونه خلک راټول شوي وو چې ماشومان هم پکې وو.
د ملګرو ملتونو ځانګړي راپور ورکوونکي ریچارډ بینټ په دې اعدام غبرګون ښودلای او دا یې “بې رحمانه، ظالمانه او د نړیوالو قوانینو خلاف” کړنه بللې ده.
بینټ پر طالبانو غږ کړی چې په عام محضر کې اعدامونه او «قصاص» بند کړي.
د طالبانو له واکمنۍ وروسته دا په افغانستان کې د دغې ډلې د محاکمو له لوري ۱۱م «قصاص» دی چې عملي کېږي.