تاند ( چهارشنبه د مرغومي ـ جدي ۱۰مه) د طالبانو حکومت ویاند ذبیح الله مجاهد وايي، دوی له پاکستان سره کوم مشکل نه لري او هغوی چې څه مشکل لري د خبرو له لارې باید حل شي.
مجاهد زیاته کړې چې د افغانستان او پاکستان ترمنځ تاوتریخوالی د یوه لوري په ګټه هم نه دی.
مجاهد له یوه خصوصي تلویزیون سره مرکه کې دا څرګندونې کړې دي.
د پاکستان حکومت طالبان د دغه هېواد ضد وسلوالو په ملاتړ تورنوي او وايي افغان خاوره کې یې ځای ورکړی دی.
خو د طالبانو حکومت د دې تورونو ردولو سره اسلام اباد د افغانستان پرضد د داعش پر ملاتړ تورنوي.
د کابل او کندهار په ګډون د افغانستان ځینې سیمو کې د پاکستان هوايي بریدونو ته پر ډیورنډ کرښه د طالبانو ځواب پسې دواړو خواوو ته لارې تړلې دي.
که څه هم قطر، ترکیه او سعودي کې د دواړو لورو ترمنځ خبرې وشوې، خو کومه نتیجه یې ور نه کړه.