تاند (پنجشنبه، د مرغومي/ جدي 4 مه) د افغانستان د المونیمي قوطیو د تولید د لومړۍ فابریکې د جوړولو کار د پنجشنبې په ورځ په هرات ولایت کې رسماً پیل شو، چې دا د صنعتي ودې او اقتصادي ځانبسیاینې پر لور یو مهم ګام بلل کېږي.
په اقتصادي چارو کې د ريیس الوزرا مرستیال، ملا عبدالغني برادر، د هرات د صنعتي پارکونو په ساحه کې د «پامیر» په نوم د المونیمي قوطیو د تولید شرکت د بنسټ ډبره کېښوده.
د فابریکې د مسوولانو په وینا، د دې ډول قوطیو فابریکه تراوسه په افغانستان کې نه وه او دا په خپل ډول کې لومړنۍ ده چې ۱۲۰ میلیون ډالره پانګونه پرې کېږي.
دا فابریکه د هرات په صنعتي پارک کې پر ۱۶ جریبه مځکه کې جوړېږي.
چارواکي وايي، د دې فابریکې له بشپړېدو وروسته به شاوخوا ۱۷۰۰ افغانانو ته د کار زمینه برابره شي. د هغوی په وینا، دا پروژه به د کورني تولید په پیاوړتیا، د وارداتو پر کمولو او د ملي اقتصاد په ټینګښت کې مهم رول ولوبوي.
د مسوولانو په باور، د دې پروژې پیل د هېواد په صنعتي سکتور کې د پانګونې د زیاتوالي څرګنده نښه ده او د اقتصادي ځانبسیاینې د ودې لپاره د خصوصي سیکتور د روانو هڅو دوام ښيي.