تاند ( پنج شنبه د مرغومي ـ جدي ۴مه) د طالبانو د ریاست الوزراء اقتصادي معاونیت خبر ورکړی، چې د ملاعبدالغني برادر له لوري به نن پنجشنبه هرات کې د برېښنا د لېږد او وېش ۹ لویې پروژې پيل او ګټنې ته وسپارل شي.
اقتصادي معاونیت د یادو پروژو ارزښت ۳ اعشاریه ۹۸میلیارده افغانۍ ښودلی دی.
د دې پروژو په اړه نور جزیات نه دي خپاره شوي.
دا پروژې داسې مهال پرانیستل کېږي، چې وړمه ورځ هم د شاوخوا دوه میلیارد افغانیو په ارزښت د جوزجان ولایت قوشتېپې او درزات ولسوالیو ته د برېښنا رسونې پروژه بشپړه او ګټنې ته وسپارل شوه.
د نظر خاوندان بیا دا ډول چټک اقتصادي رغنیز کارونه د هېواد په خیر بولي او زیاتوي چې، په دې سره د برېښنا ستونزې د کمېدو ترڅنګ خلکو ته هم کاري زمینې برابرېږي.