تاند (شنبه، د لیندۍ/ قوس ۸ مه) متحده ایالاتو د مهاجرت پر ضد د پراخ کمپاین په ترڅ کې افغانانو ته د وېزو ورکړه، او آن د افغان اتیاعو د پناه غوښتنې د دوسيو ارزول هم درولي دي.
دا اعلان د هغې پېښې له ځواب سره تړاو لري چې د سپینې ماڼۍ تر څنګ رامنځته شوه، او په نتیجه کې یې د امریکا د ملي ګارډ دوه سرتېري سخت ټپیان شول چې یوې یې وروسته سا ورکړه.
د امریکا ولسمشر ډونالډ ټرمپ د پنجشنبې په ورځ اعلان کړی و چې امریکا ته به د «درېیمې نړۍ د ټولو هېوادونو» د اتباعو مهاجرت «په دایمي ډول وځنډوي».
د امریکا د بهرنیو چارو وزیر مارکو روبیو پرون ټینګار سره وویل: «د ولسمشر ټرمپ د باندنیو چارو وزارت ټولو افغان پاسپورټ لرونکو ته د ویزو ورکړه درولې ده. د امریکا تر ټولو لوړ لومړیتوب زموږ د هېواد او خلکو ساتنه ده.»
دا پیغام لږ وروسته له هغه خپور شو چې د بهرنیو چارو وزارت اعلان وکړ چې د امریکا د ملي امنیت او عامه خوندیتوب لپاره «ټول ضروري ګامونه» اخلي. وزارت څرګنده کړه چې د افغانانو لپاره د ویزو صادرول له هماغې شېبې بند شوي دي.
د ټرمپ اداره وایي چې د ټولو هېوادونو لپاره د پناه غوښتنې ارزونې هم ځنډول شوې دي او ژمنه یې کړې چې لا سختې امنیتي ارزونې او د کډوالۍ تفتیشي تګلارې به معرفي کړي.