تاند ( شنبه د لیندۍ ـ قوس ۸مه) د افغانستان کرنې، اوبولګولو او مالدارۍ وزیر مولوي عطاالله عمري، له خپل روسي سیال سره مسکو کې د دواړو هېوادونو ترمنځ د کرنې، مالدارۍ، اوبولګولو او ځمکو په برخو کې د همکاریو پراختیا په موخه ناسته کړې.
عمري په دې ناسته کې د اوبولګولو د سیستمونو د پیاوړتیا، د مالدارۍ د نسل اصلاح د پروګرامونو د پراختیا او د روسیې بازارونو ته د کرنیزو محصولاتو د صادراتو د زیاتوالي پر اړتیا ټینګار کړی.
روسیې د اوبولګولو د نوو ټکنالوژیو، عصري کرنیزو سیستمونو، تخنیکي روزنو او د کرنیزو محصولاتو د وارداتو او صادراتو د اسانتیاوو په برخه کې د همکاریو ډاډ ورکړی.
د روسیې کرنې، اوبو لګولو او مالدارۍ وزیر همداراز له افغانستان سره عملي او دوامدارې همکارۍ پیاوړتیا ته چمتووالی ښودلی.