تاند ( چهارشنبه د لیندۍ ـ قوس ۵مه) د طالبانو د حکومت د امربالمعروف نهی عن المنکر او شکایتونو اورېدلو وزارت ویلي، د روان کال لومړیو دوو ربعو کې یې د ښځو حقونو اړوند ۴ زره ۷۶۸ قضیو ته رسېدنه کړې ده.
یاد وزارت ویلي، د روان کال لومړیو شپږ میاشتو کې یې ۱۰۳۵خویندو ته د میراث حق ورکړی او ۱۵۴۵مېرمنې یې له کورني تاوتریخوالي ژغورلې دي.
یاد وزارت همدا راز ویلي، چې په دې موده کې یې ۱۳۵۶مېرمنې د خپلو حقونو ترلاسه کولو لپاره عدلي او قضايي ارګانونو ته ور پېژندلې او ۸۳۳ نورې هغه یې بیا له اجبارې نکاح ژغورلې دي.
یاد وزارت زیاته کړې د ښځو حقونو خوندیتوب ته ژمن دي او اجازه به ورنکړي، چې ښځو ته ورکړل شوي اسلامي حقوق یې تر پښو لاندې کړي.
دا وزارت داسې مهال د شپږو میاشتو راپور خپروي چې شاوخوا ۵ کاله کېږي د نجونو پرمخ د ښوونځیو او پوهنتونونو دروازې تړلې پاتې دي او لا یې د خلاصېدو څرک نه ښکاري.