تاند (دوشنبه، د لیندۍ/ قوس ۳ مه) د پاکستان د باندنیو چارو وزارت د هند د دفاع وزیر پر هغو څرګندونو شدید انتقاد وکړ چې ویلي یې و، سند د هند برخه ده او باید له هند سره یوځای شي.
د هند د دفاع وزیر راجنات سینګ د دې څرګندونو په غبرګون کې د پاکستان د بهرنیو چارو وزارت په یوه اعلامیه کې ویلي چې د هندي وزیر دا حرګندونې پاروونکې او د تاریخ خلاف دي.
پاکستان په ۱۹۴۷ م کال له هند څخه جلا شو.
د هند دفاع وزیر دا هم ویلي چې باید د کشمیر هغه برخه کې، اوس د پاکستان تر کنټرول لاندې ده، له هند سره یوځای شي.
د پاکستان د بهرنیو چارو وزارت وايي، د هند د دفاع وزیر څرګندونې د نړیوال قانون او په رسمیت پېژندل شویو پولو خلاف بللې دي.
خو سینګ ویلي چې سند له کلتوري نظره د هند برخه ده او د هند او سند ترمنځ اوسنۍ پوله کېدای شي بدله کړل شي.
د هند او پاکستان ترمنځ اړیکې سږ کال وروسته له هغه ترینګلې شوې چې هند په خپله خاوره کې د تروریستي بریدونو په غبرګون کې د پاکستان خلاف د سیندور په نامه پراخ عملیات پیل کړل.