تاند (دوشنبه د لړم ـ عقرب ۱۲مه) د هند بهرنیو چارو وزیر، جی شنکر پر اېکس لیکلي، نن (دوشنبه) له ماسپښین وروسته یې له خپل افغان سیال، امیرخان متقي سره ټلیفوني خبرې کړي او د زلزلې د قربانیانو له کورنیو سره یې خواخوږي څرګنده کړې ده.
اخوا د هند بهرنیو چارو وزارت ویاند، رندیر جېسوال ویلي، شمال کې یې د تېرې شپې د زلزلې زیانمنو کورنیو سره د مرستې په موخه خوراکي توکي راستولي دي.
جی شنکر په خپل اېکسپانه کې زیاته کړې چې د هندي ولس او افغان ولس ترمنځ دوه اړخیزې اړیکې د لا زیات ښه کېدو په حال کې دي.
تېره شپه یوه بجه ۶ اعشاریه ۳ درجې زلزلې شمالي ولایتونه په ځانګړي ډول بلخ، سمنګان او بغلان ولایتونه ولړزول.
د وروستیو مالوماتو له مخې په بلخ او سمنګان کې وروستۍ زلزلې نږدې ۷۰۰تنو ته مرګ ژوبله اړولې ده.
د بلخ او سمنګان ځايي چارواکو ویلي، چې د تیرې شپې زلزلې له امله تر ٦٦٠ کسان ژوبل شوي او شاوخوا ٤٠ تنو ژوند بایللی دی.