تاند (دوشنبه د لړم ـ عقرب ۱۲مه) د افغان ملي لوبډلې د مشر روزونکي جناتن ټراټ دنده به د ۲۰۲۶ کال د شل اوریز نړیوال جام له پای ته رسېدو وروسته چې، د فبرورۍ په میاشت کې ترسره کېږي، رسماً پای ته ورسېږي.
افغان کرکټ بورډ وایي، دا پرېکړه د کرکټ بورډ د ملي لوبډلې د راتلونکو پرمختګونو لپاره له اوږدمهاله ستراتیژیک پلان سره سمه پلې کیږي.
کرکټ بورډ په یوه خبرپاڼه کې لیکلي، جناتن ټراټ چې په ۲۰۲۲ کال کې د افغانستان د ملي لوبډلې د مشر روزونکي په توګه ټاکل شوی و، په تېرو کلونو کې یې له لوبغاړو سره نږدې کار کړی او د لوبډلې د پرمختګ او نړیوالو لوبو کې د سیالۍ وړتیا لوړولو کې یې ارزښتناک رول لوبولی دی.
سرچینه وایي د نوموړي تر روزنې لاندې، افغانستان د خپل کرکټ په تاریخ کې سترې لاسته راوړنې ونمانځلې چې پکې د دوه اړخیزه لوبلړیو ګټل، نړیوالو جامونو کې د سترو لوبډلو په ماتولو تاریخي بریاوې ترلاسه کول او هغه لاسته راوړنې شاملې دي چې د افغانستان کرکټ نړیوال حیثیت یې لا لوړ کړ.
خبرپاڼه کې راغلي: “د افغانستان کرکټ بورډ باور لري چې لکه څنګه چې ادلون بدلون یو اداري اصل دی، همداسې د روزونکو بدلون هم د نړیوال کرکټ د مخکې تګ یوه طبعي اړتیا ده. لکه څنګه چې لوبډلې وده کوي، همداسې د هغوی رهبري او ستراتیژیک اړتیاوې هم بدلېږي. هېڅ نړیواله لوبډله د تل لپاره د یوه روزونکي تر لارښوونې لاندې نه پاتې کېږي، په همدې بنسټ دا بدلون هم د افغانستان لپاره د یوه نوي فصل پیل دی، په داسې حال کې چې افغانستان کرکټ بورډ د خپل اوږدمهاله پرمختګ پر لور ګامونه اخلي.”
کرکټ بورډ وایي، د ملي لوبډلې لپاره به د نوي مشر روزونکي د ټاکلو پروسه د ۲۰۲۶ کال شل اوریز نړیوال جام له پای ته رسېدو سره سمه پیل شي.