تاند (دوشنبه، د لړم/ عقرب ۱۲ مه) د افغانستان د مالیې پخوانی وزیر هدایت امین ارسلا د ورپېښې ناروغۍ له کبله د امریکا په ویرجنیا کې په حق ورسېد.
ارسلا د مجاهدینو د حکومت د ماليې او بهرنیو چارو وزیر و او وروسته د حامد کرزي د حکومت پر مهال د سوداګرۍ وزیر او د ولسمشر مرستیال پاتې شوی دی.
هغه د اداري اصلاحاتو د خپلواک کمېسیون، د ملي احصایې کمېسیون او د اقتصادي همکاریو د کمېټې مشري هم کړې وه، او د یوې مودې لپاره د ولسمشر حامد کرزي سلاکار پاتې شوی و.
دی د ۲۰۱۳ تر اکتوبر پورې د حامد کرزي په حکومت کې د مرستیال ولسمشر او مالیې وزیر په توګه کار کړی دی.
ده د ۲۰۰۹ او ۲۰۱۴ میلادي کلونو د ولسمشرۍ په ټاکنو کې هم ځان کاندید کړی و.
ارسلا د ۱۹۴۲ د جنورۍ په ۱۲ مه زېږېدلی و.
ارسلا، اصلاً د ننګرهار ولایت دی خو په کابل کې لوی شوی، همالته یې لېسه لوستې ده. لیسنانس او ماستري یې د امریکا په جنوبي الیونایز پوهنتون کې ترلاسه کړې وه. افتخاري دوکتورا یا پي ایچ ډي یې په ۲۰۰۸ کال د واشنګټن ډي سي له جورج واشنګټن څخه ترلاسه کړې ده.
ده په ۱۹۶۹ م کال په نړیوال بانک کې کار پیل کړ، هلته یې ۱۸ کاله کار وکړ
حاجي عبدالقدیر، دین محمد او عبدالحق یې د تره زامن وو.