تاند ( یکشنبه د لړم – عقرب ۱۱مه) ایران د ۱۴۰۴ کال د تلې میاشتې له پیل راهیسې د بهرنیو اتباعو کار قانوني او په ځینو اقتصادي سکتورونو کې د کاري ځواک کمښت پوره کولو لپاره د “کار ویزې” طرح عملي کړې ده.
د ایران د همکارۍ، کار او ټولنیزې هوساینې وزارت اعلان وکړ چې کار غوښتونکي کولی شي د کار وزارت د رسمي ویب پاڼې له لارې د بهرنیو کارګرانو لپاره غوښتنه وکړي.
یاده اداره زیاتوي چې، د کاري وېزو غوښتنلیکونه به یوازې هغه وخت ومنل شي کله چې د مطلوب کار لپاره هېڅ ایرانی کارګر موجود نه وي.
سرچینه زیاتوي، هغه بهرني اتباع چې د دې ویزې لپاره غوښتنه کوي باید ځینې شرایط پوره کړي.
شرايط:
د اعتبار وړ استوګنې اسناد چمتو کول، جرمي ریکارډ نه درلودل، او د مجاز کار ورکوونکي لخوا معرفي کول باید پوره کړي.
د سرچینې په وینا هغه کسان چې مخکې په خپله خوښه له ایران څخه وتلي دي د ویزو ترلاسه کولو لپاره هم لومړیتوب ورکول کیږي.
د ایران د کار وزارت چارواکو ټینګار کړی چې د دې طرحې پلي کول د کورنیو چارو او بهرنیو چارو وزارتونو سره په همکارۍ ترسره شوي او هدف یې د مختلفو اقتصادي سکتورونو لپاره اړین کاري ځواک چمتو کول دي.
دا اقدام په داسې وخت کې ترسره کیږي چې په وروستیو کلونو کې په ایران کې د ساختماني، کرنې او خدماتو سکتورونو کې لوی شمېر کډوال، په ځانګړي توګه افغانان کار کوي.
خو د روان کال تر نیمایي پورې، نږدې دوه میلیونه افغان مهاجرین له هیواده وتلي دي.