تاند ( یکشنبه د لړم – عقرب ۱۱مه) افغان کرکټ ملي لوبډلې، زمبابوې کرکټ ملي لوبډلې ته د شلاوره لوبلړۍ په درېیمه لوبه کې د ۹ منډو په توپیر ماتې ورکړه او دا لوبلړۍ یې «درې پر صفر» وګټله.
په نننۍ درېیمه لوبه کې لومړی افغان لوبډلې توپوهنه وکړه او زمبابوې لوبډلې ته یې د ۲۱۱ منډې هدف ورکړ.
د افغان لوبډلې د توپوهنې په برخه کې تر ټولو ډېرې منډې (۹۲) رحمن الله ګربز وکړې، ابراهیم ځدراڼ په ۴۹ بالونو ۶۰ منډې جوړې کړې او ورپسې ځوان لوبغاړي صدیق اتل په ۱۵ توپونو ۳۵ چټکې منډې وکړې.
زمبابوې لوبډلې د ټولو اورونو په لوبولو ۲۰۱ منډې وکړې او دا درېیمه لوبه یې هم افغانستان ته د ۹ منډو په توپیر وبایلله.
د لوبې غوره لوبغاړی، رحمن الله ګربز او د ټولې لوبلړۍ غوره لوبغاړی ابراهیم ځدراڼ شو چې ،په درې واړو لوبو کې یې درې پنځوسیزې وهلې وې.