تاند (یکشنبه، د تلې/ میزان ۲۰ مه) د پاکستان د بهرنیو چارو وزارت تېره شپه په یوه اعلامیه کې د هند او افغانستان د ګډې اعلامیې (چې د ۲۰۲۵ کال د اکتوبر پر ۱۰مه په نوې ډېلي کې خپره شوې) پر ځینو برخو نیوکې کړي او ویلي چې خپلې سختې نیوکې یې په اسلام اباد کې د افغانستان سفیر ته څرګندې کړې دي.
د پاکستان د بهرنیو چارو وزارت د لویدیځې آسیا او افغانستان د چارو مرستیال وزیر افغان سفیر ته ویلي، چې په دې اعلامیه کې د هند د خاورې په توګه د «جمو او کشمیر» یادول، د ملګرو ملتونو د امنیت شورا د اړوندو پرېکړهلیکونو او د کشمیر د قانوني وضعیت ښکاره سرغړونه ده.
په اعلامیه کې دا ډول څرګندونې د هغو خلکو د قربانیو او احساساتو بېاحترامي بلل شوې چې د پاکستان په ادعا د «هند تر ناقانونه نیواک لاندې» کشمیر کې د خپلې ارادې د حق لپاره «عادلانه مبارزه» کوي.
پاکستان د افغانستان د بهرنیو چارو وزیر هغه څرګندونې هم په کلکه رد کړې، چې ګواکې ترهګري د پاکستان «کورنۍ» ستونزه ده. د پاکستان حکومت ویلي، دوی په ځلونو هغه شواهد له افغان لوري سره شریک کړي، چې د ټي ټي پي جنګیالي د افغانستان له خاورې د پاکستان پر ضد د افغان اړخ په ملاتړ فعالیت کوي.
د افغانستان د طالبانو حکومت په ځلونو ویلي چې په د پاکستان کې ناکراري د پاکستان کورنۍ ستونزه ده او باید په خپله یې حل کړي.
خو د پاکستان د باندنیو چارو وزارت ټینګار کړی، چې «د ترهګرۍ د کنټرول مسوولیت پر پاکستان اړول، د افغانستان سرپرست حکومت له خپلې قانوني او اخلاقي وجیبې نهشي خلاصولای، چې د سیمې د سولې او ثبات د تامین مسوولیت لري.»
د پاکستان د بهرنیو چارو وزارت یو واربیا د کډوالو له موضوع څخه د حربې په توګه کار اخیستی او ویلي چې «د وخت اړتیا ده چې هغه افغانان، چې بېاجازې په پاکستان کې مېشت دي، خپل هېواد ته ستانه شي. پاکستان د نړۍ د نورو هېوادونو په څېر او د نړیوالو اصولو له مخې دا حق لري، چې د بهرنيو وګړو حضور په خپله خاوره کې تنظیم کړي».
د پاکستان د بهرنیو چارو وزارت په اعلامیه کې د افغانستان پر خاوره د پاکستان د هوايي حملو او د افغانستان د هوايي قلمرو د سرغړونې یادونه نه ده شوې.
پاکستان دا بریدونه څو ساعته وروسته له دې وکړل چې د طالبانو د باندنیو چارو وزیر امیرخان متقي هند ته ورسېد او هندي چارواکو یې تود هرکلی وکړ.