تاند (جمعه د تلې ـ میزان ۱۸مه)افغانستان پخواني ولسمشر حامد کرزي پر کابل، پکتیکا، خوست او ننګرهار ولایتونو د پاکستان هوایي بریدونه غندلي او هغه یې د نړۍوالو قوانینو او د افغانستان د حاکمیت سرغړونه او د هېواد پر حریم تېری بللی دی.
حامد کرزي ویلي “د افغانستان او سیمې پر وړاندې د پاکستان پالیسي غیر مسوولانه ده او د همدغو ناسمو پالیسو له امله نن پاکستان له ستونزو سره لاس او ګرېوان دی.”
حامد کرزي زیاته کړې چې پاکستان باید د تېښتې، تاوتریخوالي او کړکېچ پر ځای، پر خپلو ناسمو پالیسیو بیا غور وکړي او د ناوړه پایلو د مخنیوي لپاره یې د ګاونډیتوب حقونو او نړیوالو اصولو ته درناوی وکړي او له افغانستان سره د دوستانه اړیکو پر بنسټ تعامل وکړي.
دا په داسې حال کې ده چې د طالبانو دفاع وزارت هم کابل او پکتیکا کې د پاکستان هوایي بریدونه د دواړو هېوادونو په تاریخ کې بې ساری او له تشدد ډک اقدام یاد کړ.
دفاع وزارت د دغو هوایي بریدونو په غبرګون کې ویلي، “له دې اقداماتو وروسته که وضعیت هر څومره ترینګلی کيږي پایلې به يې د پاکستان پوځ ته راجع وي.”
دغه وزارت ویلي، دغه بریدونه غندي او ” خپل حریم څخه دفاع زموږ حق ده.”