تاند (پنجشنبه د تلې ـ میزان ۱۰مه) د افغانستان او پاکستان ترمنځ د پکتیکا ولایت د انګور اډې له لارې سوداګري له دوه کلن ځنډ وروسته بیا پیل شوه.
پاکستاني رسنیو د دغه هېواد د ملي لوژسټیک شرکت د څرګندونو له مخې دغه راپور ورکړی دی.
رسنیو ویلي چې، د جنوبي وزیرستان په سیمه کې یاد شرکت د پاکستان او افغانستان ترمنځ د دې لارې بیا پرانیستې د سوداګریزو توکو د تبادلې لپاره لار اواره کړې ده.
طالبانو تر اوسه په دې تړاو په رسمي ډول څه نه دي ویلي.
انګور اډه هم د نورو سوداګریزو لارو په څېر د پاکستان او افغانستان ترمنځ پر ډېورنډ کرښه د تګ راتګ او سوداګرۍ یوه مهمه لار ده چې شاوخوا دوه کاله وړاندې د یو لړ ستونزو له امله تړل شوې وه.
د انګور اډې لاره جنوبي وزيرستان له پکتيکا ولایت سره تړي.