تاند (جمعه، د تلې/ میزان ۴ مه) د پاکستان پخواني صدراعظم عمران خان د خپل هیواد د پوځ له لوی درستیز عاصم منیر څخه غوښتي چې له طالبانو سره د خبرو لپاره افغانستان ته سفر وکړي.
عمران خان د افغانستان د جګړې تجربې ته په اشارې وویل چې حامد کرزي او اشرف غني د طالبانو پر ضد له پوځي عملیاتو سره ځکه مخالفت کاوه چې دا ډول عملیات «یوازې تروریزم لا پسې زیاتوي».
هغه د تحریک طالبان پاکستان پر ضد جګړه د افغانستان د پخواني حکومت د تجربې په څېر ناکامه تګلاره وبلله.
هغه دا څرګندونې وروسته له هغه وکړې چې د پاکستان د پوځ د هوايي بریدونو له امله په خیبر پښتونخوا کې ملکي وګړي ووژل شول. عمران خان ډیورند کرښې ته څېرمه په تیرا کې پر ملکي وکړو د پاکستان پر هوايي برید نیوکه وکړه او هغه یې د خیبرپښتونخوا د ایالني حکومت د بدنامولو لپاره هڅه وبلله.
د پاکستان پوځ وړمه شپه په تیرا کې پنځه کورونه بمبار کړل، چې په پایله کې یې د ښځو او ماشومانو په شمول لږ تر لږه ۲۲ ملکي وګړيوژل شوي دي.
دې پېښې د سیمې د اوسیدونکو اعتراضونه وپارول.
عمران خان د پنجشنبې په ورځ په اېکسپاڼه (پخواني ټویټر) کې ولیکل: «اشرف غني راته په خپله ویلي و چې پوځي عملیات یوازې تروریزم زیاتوي، ځکه چې په لړ کې یې بېګناه خلک وژل کېږي.»
ده زیاته کړه: «تر دې وړاندې حامد کرزي هم امریکایانو ته خبرداری ورکړی و چې کله عملیات ترسره شي، د بېګناه خلکو ژوند اخیستل کېږي او ۹۰ سلنه هغه کسان چې طالبانو ته ورګډېږي، د همدې تلفاتو له امله د خپګان او غصې له کبله دا کار کوي.»
نوموړي وویل چې په خپله یې د صدراعظیمۍ پر مهال له طالبانو سره اړیکې ښه کړې وې او «همدا چاره د قبایلي سیمو د ارامښت لامل شو».
عمران خان ټینګار وکړ چې د طالبانو پر ضد پوځي عملیات باید په قبایلي سیمو کې ودرول شي.
عمران خان تر دې وړاندې د خیبرپښتونخوا اعلي وزیر ته ویلي و چې له طالبانو سره د خبرو لپاره کابل ته لاړ شي خو د پاکستان مرکزي حکومت او پوځ د خیبرپښتونخوا د اعلي وزیر له سفر سره کلک مخالفت وکړ.