تاند (یکشنبه د وږي ـ سنبلې ۳۰مه) د طالبانو د حکومت د ریاست الوزراء اقتصادي مرستیال ملا عبدالغني برادر په مشرۍ د اقتصادي کمېسیون غونډه کې د کانونو او پټرولیم وزارت له لوري د معدني موادو د پروسس او صادراتو پالیسي مسوده تایید شوه.
اقتصادي معاونیت وايي، د دې پالیسۍ موخه د ملي او نړېوالو معیارونو پر اساس د معدني موادو پروسس ته زمینه برابرول، په دې تړاو د پانګونې جذب، د اړوند ادارو ترمنځ د ښۍ همغږۍ رامنځته کول، د سیمې او نړۍ بازارونو ته د معدني موادو د لیږد اسانه لاسرسی دی.
سرچینه وايي، افغانستان چې د کاني موادو له اړخه بډایه هېواد دی، تر بل هر وخت پانګونې ته ښه زمینه پکې برابره شوې ده.
دا مسوده داسې مهال تاییدېږي، چې بل لورته تازه یاد معاونیت د هېواد په لویو مهمونو بندرونو کې د لابراتواري کمپلکسونو د جوړولو طرحه هم تایید کړې ده.