تاند (پنجشنبه، د وږي/ سنبلې ۲۸ مه) په ملګروملتو کې د هند استازي د چهارشنبې په ورځ د افغانستان په اړه د امنيت شورا په غونډه کې وویل چې د طالبانو پر ضد د فشار او سزا ورکولو تګلاره تر اوسه ګټه نه ده کړې.
هغه زياته کړه چې باید د طالبانو د مثبتو اقدامونو ستاینه وشي او له هغوس سره د ناسمې پاليسۍ د اصلاح لپاره مرسته وشي.
ده وويل د هند لومړيتوب په افغانستان کې سوله او ثبات دی.
د هند استازي د پاکستان له لوري د ترهګرو ډلو د ملاتړ په تړاو د نړۍ له هېوادونو وغوښتل چې په همغږۍ سره د دې ډلو له لوري د افغانستان د خاورې د کارولو مخه ونيسي.
د هند استازي همداراز ټینګار وکړ چې هېواد يې د افغانستان امنيتي وضعيت په دقيقه توګه څاري.
د هند استازي زياته کړه چې هېواد يې د افغانستان له ولس سره د خپلو تاريخي اړيکو د پراختيا په لټه کې دی او په افغانستان کې سوله او ثبات د نوي ډېلي لپاره ډېر مهم دی.
هغه د هند او افغانستان څو سوه کلنو تمدني او فرهنګي اړيکو ته په اشارې وويل چې دا تاريخي تړاو د هند لپاره انګېزه برابروي څو له افغان ولس سره نژدې تعامل او همکاري ولري.
د هند استازي په افغانستان کې د سيمهييز اجماع پر ارزښت ټینګار وکړ او وويل هېواد يې د ملګرو ملتونو په غونډو، د دوحې په خبرو او نورو سيمهييزو غونډو کې د افغانستان د ثبات لپاره فعالانه ګډون کوي.
هغه زياته کړه چې د هند د بهرنيو چارو وزير د طالبانو له بهرنيو چارو وزير سره اړيکه نيولې ده. نوموړي د ۲۰۲۵ د اپريل پر ۲۲ د طالبانو له خوا د “پهالګام” د تروریستي بريد غندنه د ښه توګه ياده کړه.
د هند استازي پر دې ټینګار وکړ چې د افغانستان په اړه بايد يوه متوازنه تګلاره غوره شي او ويې ويل چې اوسني چلندونه د وضعيت د بدلون لامل نه ګرځي او بايد له هغو ډډه وشي.
هند د ۹۰يمې لسيزې پر خلاف، له طالبانو سره نژدې اړيکې لري. که څه هم د دې ډلې حکومت په رسميت نه پېژني، خو د بهرنيو چارو د وزير په کچه ورسره په تماس کې دی.
چين او روسيې د چهارشنبې د ورځې د امنيت شورا په غونډه کې امريکا د بنديزونو له ميکانيزمونو څخه پر ناوړه استفادې په تورنه کړه. هغوی وويل چې له طالبانو سره د اړيکو پراخول يوه نهانکارېدونکې لاره ده او امريکا ځکه له بنديزونو د فشار په توګه ګټه اخلي چې د طالبانو له زندانونو څخه د خپلو اتباعو د خوشې کېدو موضوع حل شوې نه ده.
په امنيت شورا کې د هند د استازي وينا وویل چې له طالبانو سره د نړۍ د اړيکو د پراختيا په اړه د چين، روسيې او ايران له دريځونو سره موافق دی.