تاند (پنجشنبه، د وږي/ سنبلې ۲۸ مه) ايران، چې د طالبانو پر رژیم له انتقادونو هم خوند اخلي، په ملګروملتو کې یې استازي او سفير امير سعيد ايرواني، د چهارشنبې په ورځ د افغانستان په اړه د امنيت شورا په غونډه کې وويل چې د افغانستان د کړکېچ حل يوازې د يوه ټولشموله سياسي بهير له لارې ممکن دی، داسې بهير چې د دې هېواد قومي او سياسي تنوع په کې انځور شي. هغه همداراز وويل چې نړۍ له طالبانو سره له تعامل پرته بله چاره نه لري.
د ايران استازي ټینګار وکړ چې د افغانستان راتلونکې بايد د دې هېواد د خلکو له لوري وټاکل شي او «د بهرنيانو تپل شوې حللارې» نه دوامداره دي او نه د منلو.
ايرواني زياته کړه، طالبان په افغانستان کې نهانکارېدونکی واقعيت دی او نړيواله ټولنه اړه ده چې د بشري او اقتصادي کړکېچونو د هواري لپاره ورسره رغنده او عملي تعامل ولري.
د ايران استازي د بشري مرستو د سياسي کولو د مخنیوي په تړاو وويل چې بنديزونه بايد د سياسي فشار د وسيلې په توګه ونه کارول شي او نه هم د اقتصادي ثبات يا له طالبانو سره د تعامل پر وړاندې د خنډ په توګه.
هغه همداراز غوښتنه وکړه چې د طالبانو د غړو لپاره د سفر د معافيتونو د ناوړه سیاسي استفادې مخه ونیول شي.
متحدو ایالتونو د طالبانو د چارواکو د سفر د بنديز د پای ته رسیدو مخه نيولې ده. دې اقدام د روسيې، چين او ايران د استازو غبرګونونه وپارول. هغوی وويل چې امريکا ځکه د سفر د اجازې مخالفت کوي چې لا یې د خپلو بندي شوو اتباعو د خوشې کېدو مسله له طالبانو سره حل شوې نه ده.
دا موضوع د امريکا د استازي د اعتراض سبب شوه او هغه د شورا له غړو وغوښتل چې د ملګرو ملتونو د بنديزونو د کميټې داخلي بحثونه علني نه کړي.