تاند (چهارشنبه د وږي ـ سنبلې ۲۶مه) پاکستانۍ رسنۍ وايي، اسلام آباد کې د طالبانو سفیر د دغه هېواد بهرنیو چارو وزارت ورغوښتی او د پاکستاني طالبانو د تحریک یا ټي ټي پي د فعالیتونو په اړه یې اندېښنې ورسره شریکې کړې دي.
پاکستاني چارواکو د طالبانو له سفیر، سردار احمد شکېب غوښتي، چې د کابل اوسنۍ واکمنه ډله له ټي ټي پي سره اړیکې پرې کړي او د افغان خاورې د کارېدو د مخنیوي په تړاو کړې ژمنې عملي کړي.
د طالبانو حکومت تر اوسه د خپل سفیر د احضار په اړه څه نه دي ویلي.
د پاکستاني رسنیو د راپورونو له مخې، د طالبانو سفیر ته ویل شوي، چې ټي ټي پي افغانستان کې پټنځایونه لري او د هند حکومت له لوري یې تمویل او تجهیز کېږي.
په وروستیو اونیو کې د پاکستاني پوځيانو پر وړاندې په پښتونخوا او بلوچستان کې د ټي ټي پي وسله والو جګړو زور اخیستی چې لسګونه پاکستاني پوځيان یې وژلي دي.
همدې وضعیت ته په پام تېره اوونۍ د پاکستان لومړي وزیر، شهباز شریف طالبانو ته خبرداری ورکړ، چې د پاکستان او ټي ټي پي ترمنځ باید یو انتخاب وکړي.
دا په داسې حال کې ده چې ټاکل شوې، د افغانستان لپاره د پاکستان ځانګړی استازی، صادق خان څو ورځو کې د یوه پلاوي په مشرۍ د ټي ټي پي پر سر د خبرو لپاره کابل ته ولاړ شي.
د یادونې وړ ده چې د افغانستان سولې لپاره د امریکا مخکېني استازي، خلیلزاد پاکستان ته سپارښتنه کړې وه، چې ټي ټي پي سره د جګړې پر ځای دغلته مذاکرات وکړي.