تاند (چهارشنبه، د وږي/ سنبلې ۲۶ مه) د قطر د رسمي خبري اژانس د راپور له مخې، د دغه هیواد د دولت مرستیال صدراعظم او دفاع چارو وزیر، شیخ سعود بن عبدالرحمن بن حسن آل ثاني، د افغانستان له دفاع وزیر ملا محمدیعقوب مجاهد او ورسره مل پلاوي سره وکتل.
په دې کتنه کې دواړو لورو د دلچسپۍ پر موضوعاتو او د هغو د پیاوړتیا او پراختیا پر لارو خبرې وکړې. همداراز، د سیمې او نړیوالو تحولاتو په اړه هم خبرې وشوې.
دا ناسته د دواړو هېوادونو د لوړپوړو افسرانو په حضور کې ترسره شوه.
د طالبانو دفاع وزیر ملا محمدیعقوب مجاهد پرون دوحې ته لاړ او د دغه هیواد د بهرنیو چارووزیر په ګډون یې له بېلابېلو چارواکو سره وکتل.