تاند (سې شنبه، د وږي/ سنبلې ۱۹ مه) د زړه د حملې یا سکتې د عواملو او نښو پېژندل له تاسو سره مرسته کوي چې د یوه انسان ژوند وژغورئ. د روغتیا د نړیوال سازمان د شمېرو پر اساس، په نړۍ کې له هرو ۱۰۰ کسانو څخه ۳۲ تنه د زړه په ناروغیو مري. د هغو په منځ کې بیا ۸۵ سلنه د زړه د حملې له کبله ژوند بایلي. په دې لنډکۍ لیکنه کې د زړه د حملې نښې درښیوو.
نښې په وخت وپېژنئ
که د زړه د حملې د اخطار کومه نښه لرئ، د مرستې غوښتل مه ځنډوئ. ځینې د زړه حملې ناڅاپي او ډېرې شدیدې وي، خو ځینې یې ورو ـ ورو په لږ درد او یا تکلیف پیلېږي. د خپل بدن نښو ته پام وکړئ او که داسې څه لرئ، سمدستي ۹۱۱ ته زنګ ووهئ:
د سینې تکلیف: ډېری خلک چې د زړه پرې حمله راځي، د سینې په منځ کې تکلیف احساسوي. دا کیدای شي څو دقیقې دوام وکړي یا لاړ شي او بیا بېرته راشي. دا تکلیف د فشار، مروړل کېدو، یا درد په څېر احساسېږي.
په بدن کې نورې برخې: کېدای شي په دې ځایونو کې درد یا تکلیف وي:
- لاسونه (یو یا دواړه)
- شا
- غاړه
- زنه
- معده
ساه لنډېدل: دا کیدای شي د سینې دله تکلیف سره وي یا پرته له هغه هم رامنځته شي.
نورې نښې:
- ناڅاپي یخې خولې کول
- زړه بدوالی
- د زړه تېزه یا نا منظمه درزا
- غیر عادي ستړیا
- سرګرځي/ سرڅرخي
د ښځو او نارینه وو نښې توپیر لري
لکه څنګه چې په نارینه وو کې د زړه د حملې تر ټولو عامه نښه د سینې درد یا تکلیف دی، په ښځو کې هم داسې وي. خو ښځې کېدای شي نورې نښې هم ولري چې معمولا د زړه له حملې سره لږ تړاو لري، لکه:
- اضطراب یا اندېښنه
- ساه لنډېدل
- زړه بدوالی
- کانګې کول
- د معدې ناراحتي
- د اوږې، شا یا لاس درد
- غیر معمولي ستړیا او کمزوري
مه ځنډېږئ ـ سمدستي ۹۱۱ ته زنګ ووهئ
د زړه د حملې نښې وپېژنئ. که څه هم مطمین نه یاست چې دا د زړه حمله ده، ځان معاینه کړئ.
هره دقیقه مهمه ده. چټکه هڅه ژوند ژغوري ـ کېدای شي ستاسو خپل ژوند.
که د زړه د حملې نښې لرئ، ۹۱۱ ته زنګ ووهئ. دا تقریبا تل د ژوند ژغورونکي درملنې تر ټولو چټکه لار ده.
د بیړني حالت طبي ټیم (EMS) کولی شي له رسېدو سره سم درملنه پیل کړي. دوی د زړه د درېدو په صورت کې د بیا راژوندي کولو روزنه هم لري. هغه کسان چې د امبولانس له لارې روغتون ته ورسېږي، معمولاً چټکه درملنه تر لاسه کوي.
د همدې دلایلو له مخې، غوره ده چې ۹۱۱ ته زنګ ووهئ څو مسلکي ټیم سمدستي درملنه پیل کړي او تاسو په چټکۍ سره عاجلې څانګې ته ورسوي.