تاند『یکشنبه د زمري ـ اسد ۲۶مه』د پاکستان کرکټ بورډ د غوراوي کمېټې د افغانستان، پاکستان او متحده عرب اماراتو تر منځ د شل اوره لوبلړۍ او دغه راز د اسیا جام لپاره لوبډله غوره کړې او ورسره ځېنو نورو لوبغاړو ته هم احتیاطي ځای ورکړل شوی دی.
په غوره شوو لوبغاړو کې د سلمان اغا په لوبډلمشرۍ، ابرار احمد، فهیم اشرف، فخر زمان، حارث روف، حسن عالي، حسن نواز، حسین، خوشدل شاه، محمد حارث، محمد نواز، محمد وسیم او ځېنې نور د لوبغاړو په توګه شامل دي.
ټاکل شوې چې د افغانستان، پاکستان او متحده عرب اماراتو تر منځ د شل اوريزه لوبو دری اړخيزه لړۍ د روان کال د اګست پر ۲۹ د متحده عرب اماراتو په کوربتوب د افغانستان او پاکستان تر منځ په سیالۍ پېل شي او د سپټمبر تر اوومې نېټې به دوام وکړي.
په دغو سياليو کې ټولې اووه لوبې کېږي هر هېواد به له يوه بل سره دوې دوې لوبې کوي او يوه سيالي به د پايلوبې وي.
دغه سيالۍ داسې مهال پلان شوې چې همدلته په اماراتو کې به د سپټمبر پر ۵ نېټه د اسيا کپ سيالۍ پيل او د سپتمبر تر ۲۱ به دوام وکړي.