تاند (سې شنبه، د زمريږ اسد ۱۴ مه) د پاکستان حکومت د «ناقانونه بهرنیانو د ستنولو د پروګرام» پر اساس هڅې زیاتې کړي او یو ځل بیا یې له افغان کډوالو غوښتي چې له هېواده یې ووځي.
د پاکستاني رسنیو د راپور له مخې، چارواکو تایید کړې چې د ستنولو نوې لړۍ په ځینو سیمو کې پیل شوې، او زرګونه افغانان د چمن بندر ته راټول شوي، څو له دې حکم سره سم عمل وکړي.
د پاکستان چارواکو پرون (دوشنبې) وویل، وروسته له دې چې مرکزي حکومت د افغان کډوالو د پاته کېدو موده تمدید نه کړه، د افغان کډوالو د ایستلو بهیر یې بیا پیل کړ.
دغه پرېکړه شاوخوا ۱.۴ میلیونه هغه افغانان اغېزمنوي چې د راجستر ثبوت (PoR) کارتونه لري، او د هغوی قانوني حیثیت د جون په دېرشمه پای ته رسېدلی.
ډېرو هیله لرله چې د اوسېدو موده به یې یو کال اوږده شي چې افغانستان ته تر ستنېدو مخکې شخصي کارونه لکه د ملکیتونو پلور، یا د کاروبار ختمول تنظیم کړي.
سربېره پر هغو کسانو چې PoR کارتونه لري، شاوخوا ۸۰۰ زره نور افغانان د افغان تابعیت کارتونه (ACC) لري. د دوشنبې پرېکړه د ملګرو ملتونو د کډوالو د لویې کمېشنرۍ (UNHCR) له خوا له نیوکې سره مخامخ شوه.
د ملګروملتو د کډوالو لویې کمېنشرۍ د جون میاشتې د راپور له مخې، سږ کال لږ تر لږه ۱.۲ میلیونه افغان وګړي له ایران او پاکستان څخه جبراً ستانه شوي دي.
د کورنیو چارو یوه جګپوړي چارواکي ویلي چې دا عملیات به «په درناوي او منظم ډول» ترسره شي.
دا نوی امر د سږ کال د اپرېل د ۳۰مې نیټې له حکمه وروسته صادر شوی، چې د افغان تابعیت کارت (ACC) لرونکو او بېسندو کسانو ته د وروستي ضربالاجل نېټه ټاکل شوې وه. له هغه راهیسې تر ۸۰ زره زیات افغانان له پاکستانه وتلي دي.
چارواکو یو ځل بیا خبرداری ورکړی چې بېسندو بهرنیانو ته د پناه یا کار برابرولو پر وړاندې به سخت اقدامات وشي.
که څه هم اسلاماباد دا اقدام د ملي امنیت له مخې توجیه کوي، خو دغه کمپاین د نړیوالو بشري حقونو بنسټونو او کابل نیوکې راپارولي، او هغه یې د نړیوالو اصولو خلاف بللی دی.