تاند (جمعه، د زمري/ اسد ۱۰ مه) د پاکستان فدرالي کابینې د پنجشنبې په ورځ پرېکړه وکړه چې دغه هیواد ته د افغانستان د وارداتو تعرفې دې ټیټې شي.
د پاکستان د نیوز ۲۴ ټلویزیوني چاینل د راپور له مخې، دا پرېکړه وروسته له هغه وشوه چې تېره اوونۍ د افغانستان او پاکستان ترمنځ د «ژر نتیجه ورکوونکي» سوداګریز پروګرام په اړه موافقه وشوه، چې هدف یې د دوهاړخیز تجارت پراخول دي.
د پاکستان د سوداګرۍ وزارت دا وړاندیز کړی و، چې کابینې تر غور وروسته تایید کړ.
د دې نوې پرېکړې له مخې، پاکستان به پر یو شمېر افغان کرنیزو محصولاتو د وارداتو مالیې یا خو ختمې کړي یا به یې راکمې کړي. پر روميبانجانو (ټماټرو) ۵ سلنه مالیه له منځه وړل شوې، او پر انګورو، انارو او مڼو تعرفه له ۵۳ سلنئ څخه ۲۷ سلنې ته راټیټه شوې ده.
په بدل کې، افغانستان به هم د پاکستاني صادراتو پر محصولاتو مالیات راکم کړي. د پاکستاني الوګانو (کچالو) مالیه به له ۵۷ سلنې څخه ۲۲ سلنې ته راښکته شي، او پر کیلې به ۳۰ سلنه کمښت راشي. د آم او کوپرۍ یا ناریال پر صادراتو به ګمرکي مالیه ختمه شي، او نور مالیات به له ۴۷ سلنې څخه ۲۷ سلنې ته راکم شي.
د نیوز ۲۴ د راپور له مخې، دا اقدامات د دې لپاره دي چې دوهاړخیز تجارت پراخ شي، د اساسي توکو بیې راکمې شي، او د هغو دوو ګاونډیو هېوادونو اقتصادي اړیکې پیاوړې شي، چې وخت ناوخت یې اړیکې د سیاسي او امنیتي ترینګلتیاوو له امله خړې شوي دي.