څوک وایی لرغونې ده چا ته لا وړه ښکاري
ما ته خو خوږه ښکاري دا د پښتنو ژبه
دا مې د نیکه ژبه دا مې د انا ژبه
دا مې د شیدو ژبه دا مې د زانګو ژبه
دا د کټواز ژبه دا ارغنداب ژبه
دا د باجوړ ژبه دا د یوسفزو ژبه
دا مې د داستان ژبه دا مې د نارو ژبه
دا مې د منګو ژبه دا مې د مصرو ژبه
دا مې د قلم ژبه دا مې د چلم ژبه
دا مې د آدم ژبه دا مې د درخو ژبه
ته پوه شه دربار پوه شه لوله فرمانونه دې
زما ده د بزګر ژبه زما ده د شپنو ژبه
ناڅې ملنګ جان په کې ژاړي مامد نور په کې
زانګې بهایی جان په کې دا مې د حجرو ژبه
زرکې مې پښتو وایې کاڼې مې پښتو وایي
تورې مې پښتو وایي دا د میړنو ژبه
درومي په سیندونو کې نغاړي چنارونو کې
غورځي په ډولونو کې دا د سردرو ژبه
باندې جهان ارت دی مه یې تنګوه په ځان
نظم په پښتو وایه واوره د پردو ژبه