تاند『یکشنبه د چنګاښ ـ سرطان ۲۹مه』 افغانستان کې د طالبانو د برېښنا شرکت وایي، د برېښنا لوړ ولتاژ تخنیکي کارکوونکو له ترکمنستانه هرات ولایت ته د ۲۲۰ کیلوولټ وراداتي برېښنا پروژې چارې بشپړې کړې.
یاد شرکت زیاته کړه چې، د وارداتي برېښنا نیمګړې دغې پروژې چارې، چې د ترکمنستان ۲۲۰ کیلوولټ برېښنا د هرات نورالجهاد سب سټېشن سره نښلوي په ۴۲ کاري ورځو کې بشپړې کړې.
یادې پروژې ته د ۵۰۰ ملیونه افغانیو په ارزښت تخنیکي تجهیزات چمتو شوي و، خو چارې یې نیمګړې پاتې وې.
د طالبانو د برېښنا شرکت وایي، د دې پروژې بشپړېدو سره به هرات ولایت کې د برېښنا د کمښت ستونزه حل شي.
دا پروژه داسې مهال بشپړېږي، چې د یو شمېر تودو ولایتونو اوسېدونکي د برېښنا له پرچاوۍ شکایت لري.
دوی وایي له یوه لوري ګرمي او بل لورته د برق پرچاوي د تودو سیمو د خلکو ژوند تریخ کړی دی.
کارپوهان بیا د دې ستونزې مناسبه حل لار پر داخلي اوبو پانګونه یادوي.
دوی وایي که طالبان پر کونړ سیند د برېښنا بند جوړ کړي نو راتلونکي ته به هېواد د برېښنا له واردولو خلاص وي.