تاند『سه شنبه د چنګاښ ـ سرطان ۲۵مه』د ملګرو ملتونو د خوړو او کرنې نړیوال سازمان (F.A.O) خبرداری ورکړی چې، وچکالۍ د افغانستان ۱۹ ولایتونه اغېزمن کړي دي.
د دغه سازمان د افغانستان څانګي نن (سه شنبه) پر خپله اېکس پاڼه دا اندېښنه څرګنده کړې ده.
یاد سازمان فاریاب یو له هغو ولایتونو یاد کړی چې، د وچکالۍ له امله سخت ځپل شوی او اوسېدونکي او کروندګر یې د اوبو او څړځایونو له کمښت سره مخ دي.
افغانستان کې د وچکالۍ په اړه اندېښنې ورځ تر بلې په زیاتېدو دي.
د نظر خاوندان یې لامل د خلکو او د حکومت بې پروایي بولي.
په دې وروستیو کې د ټولنیزو رسنیو یو شمېر فعالانو هم پر خلکو غږ کړی چې، د اوبو په کارولو کې احتیاط وکړي؛ څو هیواد مو له وچکالۍ څخه وژغورل شي.
دغه خبر داسي مهال خپرېږي، چې، تر دې وړاندې د طالبانو د اوبو او انرژۍ وزارت هم ویلي و چې په کندهار، هرات، میدان وردګ، بامیان، کابل او مزارشریف ښارونو کې اوبه په بې ساري ډول ټیټې شوي دي.