تاند『سه شنبه د چنګاښ ـ سرطان ۲۵مه』د ملګرو ملتونو د کډوالو عالي کمېشنرۍ (UNHCR) د تاجکستان له لوري د افغان کډوالو د احتمالي جبري ايستلو په تړاو اندېښنه ښودلې ده.
افغانستان لپاره د ملګرو ملتونو د کډوالو عالي کمېشنرۍ ځانګړي استازي عرفات جمال رسنیو ته ويلي، چې د دوی معلومات ښيي، د تاجکستان حکومت افغان کډوالو ته د ايستلو ضربالاجل ټاکلی؛ خو تر دې دمه یې کوم عملي اقدام نه دی کړی.
جمال زياته کړې، چې له طالبانو سره په همغږۍ، د ډيورنډ اغزن تار په اوږدو او د تګ راتګ له لویو لارو سره نېږدې، له راستنو شويو افغانانو سره د لومړنیو بشري مرستو رسولو ته ژمن دي.
دا اندېښنه داسې مهال ښودل کېږي، چې اوس هم هره ورځ زرګونه کسان له پاکستان او ایرانه راستنېږي.
اوچا تازه په افغانستان کې د راتلونکو کډوالو د وضعیت په اړه اندېښنه ښودلې او زیاته کړې ده چې د مرستو اړتیا په زیاتېدو ده او بودیجه کمه.