تاند (چهارشنبه، د چنګاښ/ سرطان ۱۸ مه) سعودي عربستان د سې شنبې په ورځ یو ځل بیا د افغانستان د امنیت او ثبات ملاتړ څرګند کړ، د دې هېواد د حاکمیت او ځمکنۍ بشپړتیا د درناوي غوښتنه یې وکړه، او د افغان ولس پر بشري او اقتصادي ستونزو یې ژوره اندېښنه وښوده.
د الشرق الوسط ورځپاڼې د ننني راپور له مخې، د سعودي عربستان دایمي استازي، سفیر ډاکټر عبدالعزیز الوسیل، د افغانستان د وضعیت په اړه د ملګرو ملتونو د عمومي اسمبلۍ په ځانګړې غونډه کې، پر نړیوالې ټولنې غږ وکړ چې خپلې هڅې ګړندۍ کړي، بېړنۍ بشري مرستې ورسوي، د خلکو کړاوونه راکم کړي او د ښځو او نجونو حقوق خوندي کړي.
الوسیل وویل: «د سعودي شاهي دولت پر دې ټینګار کوي چې افغان ښځو ته باید ځواک ورکړل شي، او د هغوی د زدهکړې، کار او په ټولنیز ژوند کې د ګډون حقونه باید پیاوړي شي»، نوموړي په جده ښار کې د «د اسلام په چوکاټ کې د ښځو وضعیت» کنفرانس پایلې هم یادې کړې.
هغه دا هم څرګنده کړه چې سعودي عربستان د پاچا سلمان د بشري مرستو او مرستو د مرکز له لارې د افغانستان لپاره بشري مرستې برابرې کړې دي، او دا د دې هېواد ژوره ژمنتیا ښيي چې غواړي د افغانستان روانو کړکیچونو ته پام وکړي.
الوسیل خبرداری ورکړ چې باید د افغانستان خاوره د ترهګرۍ لپاره امن پناهځای یا د مخدره توکو د قاچاق مرکز نه شي، ځکه دا به د سیمې او نړۍ امنیت ته جدي ګواښ وي.
د سعودي استازي یو ځل بیا ټینګار وکړ چې ریاض د سیاسي، بشري او پراختیایي نوښتونو ملاتړ ته ژمن دی، څو په افغانستان کې دايمي ثبات تأمین شي.
سعودی عربستان هم هڅه کوله د تیر په څیر د اوسني نظام په رسمیت وپیژني ځکه روسیه تازه وپیژانده نو کله چې نړیوالي محکمي له لوری د نوی نظام مشرانو په اړه حکم صادر شو نو سعودی عربستان اوس هڅه کوي هغه ستونزه چې تل په افغانستان او نړیواله سطحه د خبرو سر ټکي دي یادونه کړي چې تعلیم او کار اوبار د ښځو ستونزو ته اشاره کړی مطلب دا چې که دا ستونزی حل شي سعودی لیواله ده چي بیایی په رسمیت وپیژني