تاند『شنبه د چنګاښ ـ سرطان ۷مه』د ټرانسپورټ او هوايي چلند وزارت د هوا پېژندنې ریاست اټکل کړی، چې نن شنبه او سبا یکشنبه (د چنګاښ له ۷مې تر ۸مې) د هېواد په ۱۶ ولایتونو کې د ورښتونو اټکل کړی دی.
کابل، پروان، کاپيسا، نورستان، کونړ، ننګرهار، لغمان، لوګر، ميدان وردګ، غزني، زابل، پکتيا، خوست او پکتیکا هغه ولایتونه چې پکې د باران، تېزو بادونو، خاورو او دوړو او ناڅاپي سېلابونو د راتلو اټکل شوی دی.
د یادې ادارې په خبرپاڼه کې راغلي چې د باران اندازه به په بېلابېلو سیمو کې له ۱۰ تر ۳۵ میليمترو او د دوړو او خاورو چټکتیا به له ۵۰ تر ۸۵ کیلومتره په ساعت کې وي.
ننګرهار، خوست، میدان وردګ او لوګر ولایتونو کې د جمعې د ورځې سیلابونو او ورښتونو خلکو ته په زیاته اندازه مالي زیانونه اړولي دي.
په دې سیلابونو کې یوازې د ننګرهار مهمندې ولسوالۍ کې د خلکو ۵ سوه جریبه ځمکه اوبو وړې ده خو د ځاني زیان راپورونه نه دي ورکړل شوي.