تاند『شنبه د چنګاښ ـ سرطان ۷مه』د طالبانو د حکومت مرستیال ویاند حمدالله فطرت افغانستان کې د پاکستان ضد ډلو فعالیت په اړه د پاکستاني پوځ مشر عاصم منیر ادعا ناسمه وبلله او هغه یې رد کړه.
حمدالله فطرت ویلي، له افغانستانه هېڅ هېواد ته ګواښ نشته او نه هم افغان حکومت د سیمې په ځانګړې ډول ګاونډیو پر ضد د افغان خاورې د کارونې اجازه ورکوي.
د پاکستاني پوځ مشر عاصم منیر ادعا کړې وه، چې د هند په ملاتړ ډلې د افغانستان له خاورې د پاکستان ضد فعالیت کوي.
خو د طالبانو ویاند فطرت زیاته کړه چې، طالبان له هند او پاکستان سره ښې اړیکې غواړي او د هېوادونو ترمنځ په بې پرې سیاست باور لري.
نوموړي وایي، افغانستان ته له پاکستان سره اړیکې مهمې دي او هند سره هم اړیکې د ګټو په اساس دي.
د هند، پاکستان اړیکې په دې وروستیو کې د کشمیر پهلګام کې پر سیلانیانو د برید پر سر او تر هغه وروسته له وسله والې جګړې را پدیخوا ډېرې نازکې شوي دي.
سیاسي شنونکي بیا پاکستان د ترهګرۍ ځاله بولي او زیاتوي، چې دوی هڅه کوي، د خپلې ملامتۍ پړه پر افغانستان واچوي.