تاند【پنجشنبه د غبرګولي ـ جوزا ۱۵مه】امریکا متحده ایالت د ملګرو ملتونو د امنیت شورا له لوري د غزې اوربند پرېکړه لیک ویټو کړ.
امریکايي استازې ډوروتي شیا دې پرېکړه لیک ته داسې مهال منفي رایه ورکړه، چې لا هم غزه کې د اسراییلو له لوري بریدونه روان دي.
د غزې اوربند پرېکړه لیک د امنیت شورا د ۱۵ غړو له ډلې ۱۴ تنو تایید کړی و.
خو امریکا چې د دایمي غړي په توګه د ویټو حق لري، منفي رایه وکاروله.
که څه هم د اوربند په پرېکړه لیک کې د اسراییل د یرغمل شویو د خوشې کېدو غوښتنه هم شوې وه، خو امریکايي استازې ویلي، چې د امریکا لپاره دا پرېکړه لیک غیر عملي دی.
نوموړې استدلال کړی،چې پرېکړه لیک حم اس نه غندي، بې وسلې کوي یې نه او له اسراییلو دا حق اخلي چې د حم اس د بریدونو پر وړاندې له ځانه دفاع وکړي.
د غزې اوربند ته د منفي رایې ورکولو له امله چین، فرانسې او یو شمېر نورو هېوادونو سخت غبرګون ښودلی او دا یې اقدام یې د نړیوالو هڅو پر وړاندې خنډ او د بشري حقونو ضد بللی دی.