تاند (شنبه، د غويي/ ثور ۲۷ مه) د افغانستان د طالبانو د حکومت د بهرنیو وزارت سرپرست، امیرخان متقي نن (شنبه، د ثور ۲۷مه) د ایران د حکومت په رسمي بلنه تهران ته لاړ.
د بهرنیو چارو وزارت ویاند ضیااحمد تکل په وینا، دا سفر د تهران په دیالوګ اسمبله (د خبرو اترو غونډه) کې د ګډون، او د کابل او تهران ترمنځ د دیپلوماتیکو او اقتصادي اړیکو د پیاوړتیا لپاره شوی دی.
ښاغلي تکل ویلي چې د دې سفر موخه د تهران په غونډه کې ګډون، له ایراني چارواکو سره لیدنې او د دواړو هېوادونو ترمنځ د دوه اړخیزو اړیکو په اړه خبرې دي. نوموړي زیاته کړې چې د اقتصاد وزارت مسلکي معین عبداللطیف نظری هم د دې پلاوي په ترکیب کې تهران ته تللی دی.
د بهرنیو چارو وزارت ویاند مخکې ویلي و چې متقي به د روانې میلادي میاشتې په پای کې چین ته هم سفر وکړي.
د چهارشنبې په ورځ هم د طالبانو د حکومت یو پلاوی، د ملا عبدالغني برادر په مشرۍ، تاتارستان ته لاړ.