تاند (شنبه، د غويي/ ثور ۲۷ مه) د امریکا یو شمېر قانون جوړونکي پر کانګرس فشار راوړي چې له خطر سره مخامخ افغان متحدانو ته د مهاجرت ۲۰ زره اضافي ځانګړي ویزې (SIVs) تصویب کړي.

د استازو جرګې غړي جېسن کرو (دیموکرات – کولوراډو) له کانګرس څخه غوښتنه کړې چې هغو افغانانو ته د مهاجرت ۲۰ زره اضافي ځانګړي ویزې ورکړي چې د افغانستان د جګړې پر مهال یې له امریکايي ځواکونو سره مرسته کړې. نوموړي ټینګار کړی چې د دغو کسانو د خوندي ساتلو لپاره اخلاقي مسوولیت شته، ځکه ډېری یې د طالبانو له خوا د غچ اخیستنې له ګواښ سره مخامخ دي.

دا وړاندیز د دواړو ګوندونو ملاتړ ترلاسه کړی، او د استازو جرګې له ۱۰۰ زیات غړي یې ملاتړ کوي. قانون جوړونکي وايي چې د SIV پروګرام پراخول هم د ملي امنیت اړتیا ده او هم اخلاقي مسوولیت، تر څو افغان متحدان د افراطي ډلو له خطرونو خوندي پاته شي.

سره له دې چې دا موضوع ډېره مهمه ده، خو د SIV غوښتنلیک بهیر لا هم پېچلی او وخت‌نیونکی دی. غوښتونکي باید سختو امنیتي پلټنو، د بایومټریک معلوماتو راټولولو او څو مرکو ته حاضر شي، چې له امله یې ډېر کسان یا خو لا هم په افغانستان کې پاتې دي یا یې په ګاونډیو هېوادونو کې وضعیت ناوړه دی.

د ۲۰۲۴ په مارچ کې، کانګرس د افغان متحدانو لپاره ۱۲ زره نورې ویزې منظور کړې، چې له دې سره د پروګرام عمومي حد ۳۸۵۰۰ ویزو ته لوړ شو. خو دا زیاتوالی لا هم د ۲۰ زره ویزو غوښتنې ته ځواب نه شي ورکولی، او ډېر غوښتونکي لا هم د پروسس په تمه دي.

د وکالت ډلو او پخوانیو پوځیانو هڅې پیل کړي چې د افغان متحدانو د ژغورنې لپاره قانوني اقدامات وشي. د «افغان متحدانو د ساتنې قانون» چې په ۲۰۲۳ کال کې معرفي شو، هڅه کوي چې دا پروګرام تر ۲۰۲۹ کاله وغځوي، د ویزو شمېر زیات کړي، د سیسټم نیمګړتیاوې حل کړي او د غوښتنلیک بهیر ګړندی کړي.

د ۲۰ زره اضافي ویزو غوښتنه دا څرګندوي چې امریکا غواړي له هغو افغانانو سره خپلې ژمنې پوره کړي چې د امریکايي ماموریت پر مهال یې خپل ژوند په خطر کې اچولی و. لکه څنګه چې وضعیت په افغانستان کې لا هم نازک دی، نو پر وخت قانوني اقدام د دغو کسانو د خوندیتوب لپاره ډېر مهم دی.

د کانګریس د غړیو او پخوانیو پوځیانو په وینا، که کانګرس ژر اقدام و نه کړي، نو دا به نه یوازې د افغان متحدانو ژوند له خطر سره مخامخ کړي، بلکې د امریکا نړیوال اعتبار ته به هم زیان ورسوي.