تاند【شنبه د ثور ـ غویي ۱۳مه】د کابل – کندهار پر لویه لار د میدان وردګو ولایت سیداباد ولسوالۍ لوړۍ سیمه کې د ترافیکي پېښې له امله ۱۷ تنه مړه او ژوبل شوي دي.
په یاد ولایت کې د طالبانو امنیه قومندانۍ ویلي، پېښه تېر ماښام د یو فلډر او لوکسل ډوله موټر د ټکر له امله رامنځته شوې ده.
سرچینه زیاتوي، چې په دې پېښه کې د ۳ ماشومانو او ۲ مېرمنو په ګډون ۷ تنو ژوند بایللی او د پنځو ماشومانو په ګډون ۱۰ تنه نور ژوبل شوي دي.
سرچینې ویلي چې، ټپیان یې روغتون ته انتقال کړي دي، چې روغتیایي کارکوونکو د ځینو ټپيانو حالت نازک ښودلی.
دا په تېرو څو میاشتو کې د کابل – کندهار پر لویه لار څویمه خونړۍ ترافیکي پېښه ده، چې له کبله یې لسګونه هېوادوالو ته مرګ ژوبله اوړي.