د افغانستان د خبریالانو مرکز د ۱۴۰۳ کال د خبریال د دولسم پړاو کلنۍ جایزې د اپرېل پر ۲۸مه نېټه د بلجیم په پلازمېنه بروکسل کې، په تبعید کې د مېشتو یو شمېر افغان خبریالانو په ګډون، اعلان کړې.
د افغانستان د خبریالانو د مرکز مشر احمد قریشي تاند ته وویل چې نږدې ۵۰ افغان خبریالانو او د رسنیو استازو په دې رقابتي پروسه کې ګډون کړی و، چې له ډلې یې د غور ولایت د سرحد په نوم یوې محلي راډیو خبریاله نسرین سیدي، له بلخ ولایت څخه عزیز الله وحدت، له خوست څخه محمد یوسف منګل، او له کابل څخه احسان الله کریمي او رامین مظهر د ۷۰ زره افغانیو نغدي جایزې او ځانګړي ایوارډونه تر لاسه کړل.
افغان خبریال غلام الله حبیبي د دغه ډول پروګرامونو هرکلی کوي او وایې چې دا سیالۍ د خبریالانو د هڅونې، زړورتیا او مسلکي پرمختګ لپاره مهم رول لري.