۲۸ اپرېل ۲۰۲۵ د اسپانیا او پرتګال په ګڼو سیمو کې نن غرمه د برېښنا لویه ستونزه رامنځته شوه چې له امله یې میلیونونه خلک اغېزمن شول. د اسپانیا حکومت په درې خودمختارو سیمو کې بیړنی حالت اعلان کړی دی.
د اسپانیا د کورنیو چارو وزارت وايي چې په مادرید، ایکستریماډورا او اندلوسیا سیمو کې د بیړني حالت اعلان له دې امله شوی چې د سیمو چارواکو د مرستې غوښتنه کړې وه.
اوس د بیړني حالت له مخې، د سیمهییزو مرستو چارې د کورنیو چارو وزارت ته سپارل شوې دي.
د برېښنا قطع کېدو له امله د سړکونو، اورګاډو او هوايي ډګرونو په تګ راتګ کې درانه خنډونه رامنځته شوي دي.
په زرګونو د اورګاډي مسافر په بېلابېلو تمځایونو کې بند پاتې دي، او د پروازونو مهالویشونه هم ګډوډ شوي دي.
په فرانسه کې هم د برېښنا د موقتي قطع کېدو راپورونه ورکړل شوي وو، خو هلته برېښنا شبکه ژر بېرته رغېدلې ده.
د برېښنا د غټې قطعې دقیق لامل تر اوسه نه دی څرګند شوی، خو چارواکي وايي چې پلټنې روانې دي او ژر به نور معلومات له خلکو سره شریک شي.
نور جزئيات وروسته…