تاند【دوشنبه د حمل ـ وري ۱۸مه】د ملګرو ملتونو د خوړو نړیوال پروګرام یا WFP وايي، په افغانستان کې په هرو لسو ثانیو کې یو ماشوم پر خواځواکۍ اخته کېږي.
د خوړو نړیوال پروګرام زیاتوي، چې سږ کال به په افغانستان کې ۳.۵ ملیونه ماشومان د خوارځواکۍ ښکار شي.
د یاد پروګرام افغانستان څانګې چارواکو د روغتیا نړیوالې ورځې په مناسبت ویلي، چې افغانستان دمګړۍ د ماشومانو د خوارځواکۍ په برخه کې تر ټولو بد حالت سره مخ دی.
سرچینې ټینګار کړی چې که کافي بودیجه موجوده وي، دا بحران د مخنیوي وړ دی.
د ملګرو ملتونو د خوړو نړیوال پروګرام زیاتوي، چې د بودیجې په شتون کې دوی کولای شي اغېزمن شویو ماشومانو او میندو ته کافي خواړه ورسوي.
د خوړو نړیوال پروګرام تر دې وړاندې هم د بودیجې د کمښت له امله اندېښنه ښودلې وه.
دا په داسې حال کې ده چې تازه د ملګرو ملتونو د ماشومانو د ملاتړ صندوق یا یونیسف هم په خپل راپور کې ویلي، چې افغانستان کې هرو ۴۰ امېندوارو مېرمنو کې یوه د زېږون پرمهال مري.
روغتیاپالان په هېواد کې د مور او ماشوم د روغتیا په اړه د ملګرو متلونو وروستي راپورونه ګواښوونکي او د اندېښنې وړ بولي، چې د دوی په خبره باید د مخنیوي لپاره یې اقدامات وشي.